Giuani Piazza

Johann (Giovanni/Giuani) Piazza (Unterplatzer) à laurà coche scultëur sun l luech da paur Cudan a Urtijëi. Cun Teresa Sopperra de Laste al abù cater mutons. L mut plu vedl fova Luis da Cudan, l uem de Frida Piazza. Si poejies ie metudes adum da pensieres defrënc, nia cunliei un al auter. La poejies che ie unides scrites ntan la Prima viera descrij l paesaje, la situazion, i sentimënc y l nchersciadum di saudeies ntan la viera. L ne mancia nia poejies critiches contra la viera. Te d’autra poejies descrij Giuani Piazza la natura, l’amezizia, l amor o la rujeneda ladina. La cumposizions do la viera ie dedichedes ala vita tla familia, tl luech, tla valeda o ala ciacia. Te duta la poejies lunel ora l gran crëidum dl poet.