Maria Sief
Maria (Maddalena) Sief ie nasciuda a Posauz daujin a Col de Santa Lizia. Cun nuef ani iela jita tl Coleghium a Bulsan. Pervia dla viera iela jita de reviers a cësa danter l 1943 y 1945, per pona fé la scola auta a Trënt. Cun si uem Clemente Agostini de Col ala abù trëi mutons. Sief à nsenià doi ani tla scola elementera a La Ila, 15 ani a La Plié de Fedom y 15 ani a Col. Doi ani alalongia iela stata diretëura didatica a Alleghe. Maria Sief à scrit truepa poejies de ucajion per festes, che ie n pert unides publiches tla plata de pluania Le Nuove del Paiš. La poejies de Sief ie scëmples y saurides da ntënder. Ala scritëura ti stajovel a cuer de tenì su tradizions y usanzes de Col te n bon ladin da Col.
Se volè ben
Se volè ben vol dì
co se se incontra se dì „bondì“
e fà bela zièra
a duc chi che ven.
Vol dì volentièra
fa n pico servise
e se dà na man,
siebelo sera o dadoman.
Vol dì laurà duc auna
e no stà a vardà co i auter fas
e stà da na banda
e brontolà dabàs.
Vol dì ester contenc
co la và ben ai auter;
vol dì se gode
se duc è valenc.
Per se volè ben
no vol chissà cuant,
se per se stes
no se domanda tant.
Se chì se varda
ai defec che s’à
e ce che i auter per noi
cugnon soportà.
A se volè ben
pì lesjièr s’à l cuor,
pì saurì l è l vive,
pì bel s’à l laor.
L’é nfin pì luster
el sol che sponta,
pì tievia l’aria
canche l tramonta.
En mondo de jent
o ‘n picol pais
che se vol ben,
l’é en paradis!!
Sich gernhaben
Sich gernhaben bedeutet
sich grüßen, wenn man sich begegnet,
und freundlich sein
mit allen, die zu uns kommen.
Es bedeutet, gern
einen kleinen Gefallen tun
und sich aushelfen
am Abend wie am Morgen.
Es bedeutet, gemeinsam arbeiten
und nicht zusehen, wie die anderen sich abmühen,
und danebenstehen
und leise schimpfen.
Es bedeutet, sich freuen,
wenn es den anderen gut geht;
es bedeutet genießen,
wenn alle gutmütig sind.
Um sich gern zu haben,
braucht es gar nicht so viel,
wenn man für sich selbst
nicht zu viel verlangt.
Wenn man
die eigenen Fehler sieht
und das, was die anderen unseretwegen
ertragen müssen.
Sich gernhaben
erleichtert das Herz,
macht das Leben angenehm,
verschönert die Arbeit.
Schließlich strahlt sogar
die aufgehende Sonne heller,
und die Luft ist milder,
wenn sie untergeht.
Eine Welt voller Menschen
oder ein kleines Dorf,
das sich gern hat,
ist ein Paradies!!
funtana: Rut Bernardi/Paul Videsott, Geschichte der ladinischen Literatur. Ein bio-bibliografisches Autorenkompendium von den Anfängen des ladinischen Schrifttums bis zum Literaturschaffen des frühen 21. Jahrhunderts (Scripta Ladina Brixinensia III), Bulsan 2014, pl. 1257-1258.