Cristina De Grandi
Cristina De Grandi á studié Lingac y leteratöres forestes a Padova, fajon spo le dotorat tl’Université de Siena. Ara s’á tres indô formé inant foradecá sciöche tla Francia y tl’Inghiltera. Ara insëgna lingac a Maran y colaborëia cun l’Université Lëdia de Balsan, la RAI Ladinia y le foliet La Voce del Campo. Süa opera lirica se conzentrëia sön i sentimënc umans, olache les soferënzes dla vita y dl amur é gonot le tema prinzipal. Ara á publiché sü componimënc tla revista TRAS y te so liber N iade y l’anima (2018), y traslatëia tesć tl y dal ladin. Ara vir y laora a Maran/San Martin de Tor.
Dejier
Te rausces
tre l’ur dl rü Ebr
sciöche cianes vërdes
dala ciaradöra vercia
y fora de n sarëgn
n sciosciüre
n bandore busiënt:
- Dejier –
forza che vá zoruch
al orí dla vita
tö tru dl rü atempé
tües eghes é mans
che condüj a ci’
sce an te lascia jí
lëde sön la doman.
Cristina de Grandi, N iade y l’anima, 2018, Istitut Ladin Micurá de Rü