Ruscel

Ora dl Kreis für Kunstschaffende (Lia Mostra d’Ert - Circolo) se à l ann 1953 spartì na pert di cumëmbri metan su la grupa Ruscel, che tl prim ova mo inuem Grupa di 13. La grupa Ruscel presentova si lëures ti prim ani tl chino Dolomiti y dedò tla sala, ulache l ie al didancuei la posta. Ufizialmënter ie la grupa Ruscel unida metuda su tl ann 1957 da Guido Daurù, Gottfried Moroder, Rudolf Moroder Rudolfine, Viktor Moroder, Luis Piazza, Mili Schmalzl y Adolf Vallazza. Dal scumenciamënt inant fovel nce leprò Josef Kostner, David Moroder, Raimund Mureda y Rudolf Moroder de Gottfried. Pona iel nce ruvà leprò Edmund Moroder, Finy Martiner, Gottfried Moroder junior, Bruno Vallazza, Karl Vallazza y Markus Vallazza. Uni ann metova la grupa Ruscel a jì mostres persuneles o coletives y sëuraprò nce mostres oradecà, coche a Firenze, Minca, Stockholm o Dispruch.