Scola de Ert Cademia
La Scola d’ert de Urtijëi nce numineda Cademia ie na scola auta d’ert te Gherdëina. Per miuré la cualità dl artejanat de Gherdëina iel unì metù su na scola de dessëni tl 1825 tla Cësa da Ianon a Urtijëi. Tl 1872 à Ferdinand Demetz giaurì na scola de ziplé, tlameda Staatlich subventionierte Lehrwerkstätte für Holzschnitzer, che univa meneda te si berstot y che univa finanzieda n pert da na man publica. Bele tl prim ann do la giaurida jivel 140 sculeies te chësta scola. Do la Prima gran viera ie la scola passeda sota la direzion de diretëures talians p.ej. Guido Balsamo Stella y Alcide Ticò. Dal 1890 inant fova la sënta dla scola sun Plaza S'Antone y dal 1938 inant l'ai spusteda tla cësa Cademia, na cësa cumpreda aposta dal chemun. Dal 1957 inant à Raimund Mureda sëurantëut la direzion dla scola. De chël tëmp iel da lecurdé i nsenianc Milly Schmalzl, Peter Demetz, Josef Kostner, Luis Kostner, Rudolf Moroder y Markus Vallazza. N valgun inuemes de sculeies cunesciui de chësta scola ie Gotthard Bonell, Rudi Stingel, Egon Rusina, Augusto Murer, Friedrich Gurschler, Martin Rainer, Albert Mellauner, Barbara Tavella, Lois Anvidalfarei, Franz Kehrer, Sonja Hofer, Manfred Mureda, Leander Piazza, Sergio Sommavilla, Heinz Mader y Guido Anton Muss.
