Roland Verra

Roland Verra ie n scritëur ladin. Do i studies de leteratura y rujenedes fulestieres al nsenià per plu ani tla scoles mesanes y autes. Dal 1992 al 2018 iel stat Ntendënt dla Scoles ladines de Gherdëina y dla Val Badia. Danter la publicazions letereres de Roland Verra iel da numiné L cudejel di dis y dla sajons, Dërc y storc, Sun lim de plata, Te me ancontes śën, Plates de calënder, Mpue’ de zes, La rojules tardives, Flistres y Jan sul troi dla desmincënza (roman). L à nce dat ora libri n cont dla leteratura ladina p.ej. Prim sintom d’autonn. Cunsunanzes poetiches cun Max Tosi y materiai de scola p.ej. Ancuntedes y Eghes. Cun l fotograf Hans Rabanser al publicà i libri Gröden: Begegnungen. Einblicke y Ladinien. 5 Täler in den Dolomiten (tramedoi nce per talian). Na udleda sun la realtà ladina dolomitica y prupostes de co tenì plu adum vëniel pità tl liber Una ladinia possibile. I essays y articuli scientifics de Roland Verra trata de argumënc de linguistica, de leteratura, de storia y de pedagogia. Roland Verra ie nce l autor dl film Le regn de Fanes y de plu trasmiscions radio televisives.