Lia Mostra d'Ert - Circolo
La Lia Mostra d’Ert ie na lia de cultura de Gherdëina cun sënta sun Plaza S. Antone a Urtijëi. La lia ie unida metuda su tl 1920 per mëter ora y vënder diretamënter la scultures zipledes, zënza ferlëigheri. La lia se ova tëut dant de ti pité ai scultëures de Gherdëina l mesun de pudëi presenté y de vënder si lëures, plucheauter tla mostres tenides d’instà. Do la Segonda gran viera fova la ueia de purté velch de nuef y de mudé drët granda. Tl 1947 ovi metù su la regula che n ëssa mé metù ora lëures atuei che rujenova de si tëmp y che lasciova recunëscer la persunalità dl artist. Ti ani '60 ovi metù a jì mostres oradecà y n ova nvià artisć da oradecà a mëter ora te Gherdëina. La Lia Mostra d’Ert ova nce la prima bibliotech d’ert te Südtirol. Tl 1969 se ova la lia renuvà cun l’ideies dl muvimënt dl ’68 dl secul passà. De gran mpurtanza ti ani '70 y '80 fova la performance. Mostres che à senià la storia dla lia ie states MAMALEEG y la mostra tl ciastel Prösels tl 1984. Tres la Lia Mostra d’Ert ie nce piedes via azions de sensibilisazion de stravardé l ambient (SOS Saslonch) y l lëur cun y per i jëuni. N cunlaurazion cun la Lia Mostra d’Ert iel unì dat ora la zaites Sckat (dal 1971 inant), L brunsin y Puhin (2009-2012).
