Johann Dominik Mahlknecht
Dominik Mahlknecht à coche trueps de Gherdëina scumencià bele abenëura cun l'ert dl ziplé. Al scumenciamënt dl 19ejim secul iel jit a Lyon ulache l à laurà tla sënta dla familia de marcadënc d’ert de Gherdëina Sanoner. Per miuré si fortl artejanel iel pona jit tla berstot de n scultëur a Le Mans y plu tert a Nantes. Dantaldut tl ghips y tl sas al fat busć de pultret y statues monumenteles. L ie deventà scultëur de zità a Nantes y l se à davanià l titul de Scultëur de Si Maiestà Reéla. A Paris ti iel pona unit assenià n atelier. Pervia de si lëures tl stil neobaroch y si programs iconografics nueves à Mahlknecht fat pert tla Franzia di cërtli artistics d’avantagarde da ntlëuta. L artist de Gherdëina che à nce giapà la zitadinanza franzëusa ie mort tl 1876 a Paris.