Josef Kostner
Josef Kostner ie stat n scultëur, n desseniadëur y n poet de Urtijëi. Do l 1960 al nsenià tla Scola d’ert de Sëlva. Per se destaché dal lëur artejanel de Gherdëina al cris ora de lauré tla mauta y tl peton. Cun chisc elemënc se sentivel ënghe te si vijion artistica plu liede de crië. Te si prim ani d’artist se al dantaldut dat ju cun l stude dla formes dla natura. Cun l tëmp devënta si scultures plu scëmples, cun linies plu tleres. Permò te n terzo mumënt vëniel ora defin si nteres per la persona, jan a crì sot te si ana y te si sentimënc. La ntraunides y esperienzes di puere ani de si junëza y l mudamënt do la Segonda gran viera cun l bënsté de al didancuei ie n valguni di argumënc te si poejies. L ie poejies curtes ma sëces, cun na bravura de savëi da dì truep cun puecia paroles. De valor ie nce si nrescides dla toponomastica de S. Cristina y de Sëlva.
