Vinzenz Demetz da Fëur

Vinzenz Maria Demetz, per islandëisc Sigurður Demetz Franzson, nce tlamà Zenzl da Fëur fova n tenor de Gherdëina y n cumpositëur de cianties ladines. Cun 18 ani ie Demetz jit a Padua y a Milan per se istruì coche ciantarin. Tl 1935 al venciù n pest a Viena y l à pudù jì a cianté tla Semperoper a Dresden. Demetz à ciantà tl Teatro dell’Opera de Roma, tl Teatro San Carlo a Napoli y tla Scala a Milan. Tl 1955 iel muet cun si nevicia tl Island. L à laurà a Reykjavík y Akureyri coche maester de cianté y coche dirighënt. N possa propi dì che Demetz à metù a jì tl Island l belcanto, la mujiga de opra y la ciantia d’ert. La scola de cianté Söngskóli Sigurðar Demetz a Reykjavík ti ie unida dedicheda a d’ël. La cumposizions plu cunesciudes ie Nina Nana Ladina y Anda Trina da Juntlan.